مـــنــــتــــديــات كـــويــت الـــحــب
اهــلاوســهــلا بــكـ عزيزيعزيزتي فـي مـــنــــتــــديــات كـــويــت الـــحــب واتمنى ان تكونتكونين من اسره كويت الحب

اهــلاوســهــلا بــكــم فـي مـــنــــتــــديــات كـــويــت الـــحــب
 
الرئيسيةؤاشفالأعضاءالمجموعاتالتسجيلدخولالتبادل الاعلانيالدردشه الكتابيه

شاطر | 
 

 منقوووول سوالف حلوه

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
عــأإأبــر ســبــيــلـ
نـــائــب الــمديــر الــعــام
avatar

رقم العضويه : 2
عدد المساهمات : 44
نقاط : 91
السٌّمعَة : 13
تاريخ التسجيل : 26/12/2009
العمر : 22

مُساهمةموضوع: منقوووول سوالف حلوه   الأحد يونيو 06, 2010 5:36 am


السلام عليكم


قفشـــــــات || ~ هي جـات علي أنـا ؟!




(1) جـات علي أنـا ؟! (1)




زمان يوم كنت أصغر و ( أقصر )
كنا ضيوف في بيت عمتي فكان كل يوم الغدا و العشا في بيت
فـ كنا جالسين في أول عزيمه شوي الا دخل علينا شايب .. يوم شفت فرحة البزارين و الشياب فيه حسيت ان اللي داخل علينا ( سميره توفيق )


ذا شايب بشوش و يحي المجلس بسواليفه .. يحرصون يجيبونه في كل مناسبه
فزينا نسلم .. أنا كنت آخر واحد و معي أخوي الصغير اللي اقتنع أخيرا يوقف فـ من دخلنا و هو ياكل تمر


جا هالشايب سلم ع الكل بما فيهم أخوي بس يوم جا عندي ( صفطني ) و جلس ما كنه في واحد واقف .. ففي من صاح عليه بقى واحد .. أنا مدري من وين جاتني ( الفطنه ) بسرعه سلمت عليه و هو لسى يحوس في محله يبي يوقف .. و رجعت معصب يم أخوي و قلت له ( كل تــــمر )


المهم سالفه ورا سالفه و في كل عزيمه كان ينط واحد و يقول له عطنا السالفه الفلانيه
و يتشقق الكل ( إيه إيه عطنا اياها )
أنا اندبلت كبدي كل يوم نفس السواليف و كل يوم ينط واحد يطلب نفس السالفه
و الكل يتشقق مع انه كل يوم يقولها


الين جا يوم قلت بس جا يومك يا بندر فـ تنحنحت شوي و اول ما خلص سالفته قلت له عطنا السالفه الفلانيه .. الا رد علي ( لا لا قديمه )
فـ يعني مدري ( جات علي أنا ؟ )
يكفي لي اسبوع اسلك له الأخ لاقينا بس أنا أكثر شي قهرني الدبش اللي قالوا ( إيه إيه قديمه )




ذكرني بنكتة .. اللي مساجين محكوم عليهم مؤبد عندهم كتاب نكت
حفظوا النكت اللي فيه بأرقامها فـ صار الواحد فيهم اذا وده يقول نكته قال رقمها بس
فـ يوم جاهم مسجون جديد حب يدخل معهم .. فكل شوي ينط و يقول رقم بس محد يضحك
و اذا واحد فيهم قال رقم الكل مات ضحك
فالرجال ضاق صدره .. و سأل واحد فيهم وش فيكم علي ؟ ليه أنا اذا قلت رقم محد يضحك
فـ قاله أبد و لا شي بس المسأله ماهي مسأله نكته و بس أهم شي في النكته ( اسلوب الالقاء )



..



(2) تحقيق ظروف ايجابيه من خلال ظروف سلبيه (2)




مهارات التعامل مع الظروف السلبيه و تعديلها أو الخروج منها بظروف ايجابيه كثير
نقطه الصفر فيها ما تطرق له ( الشيخ دنّحي ) و هي التفكير الإيجابي و النظر للجانب الممتلئ من الكوب , أما أكثرها استهلاكاً فهي مهاره ( الترقيع ) و اللي عادةً ينتهي فيها البنطلون إلى ( شورت )


لكن في مهاره حلوه تقدر تطلع فيها بظروف إيجابيه من ظروف سلبيه و هي مهارة كيف تصيد عصفور بـ عصفور ميت ..



: أمثله تطبيقيه :




- في ليلة جحدوك فيها كل ربعك .. استرحه , ملحق , مجلس , ( عزبة هنود) الكل جحدك
فـ و انت تدق على واحد من خوياك .. الا دخلت عليك حرمتك في اللحظه اللي يسمّعك فيها
( صوت المشغول )


انت هنا طالع فيها و قفل و انت تقول ( لا لا ماني جاي عندي موعد مع أغلى الناس )
بعدها طس نام أو شوف لك صرفه في عمرك أما هي المسكينه طبعا .. ( صدقت )



هالحركه رح تكفيك كذا اسبوع قدام .. و هي على حسب فـ انت اذا ربعك يجحدونك كثير
فـ ابشرك ( امورك طيبه )



- انحديت تطلع كوفي و لا مطعم مع واحد من خوياك الحقنه
اللي كل سواليفه عن ( مذيعات العربيه ) .. من حظك جات الفاتوره بسيطه جداً
احلف و ( طلّق ) حريم اللي جالسين كلهم انك انت اللي تحاسب لأن ( منطقياً ) الطلعه الجايه رح تكون على حسابه .. وقتها اطلب اللي ودك ..



- بعد ما كنت هربان من الدوام رجعت تاخذ جوالك اللي نسيته
دخل عليك المدير فـ سألك " وش فيك متأخر ما مشيت يا فلان ؟ "
غلطان لو قلت رجعت آخذ جوالي .. ابتسم وقل له ( راح اخلص شوية اشغال و اطلع )
لا و إن كبيت عشا ربعك و قلت انك تخلص أشغالهم أحلى و أحلى : )



..




(3) اسحب عليه سيفون (3)






برايي من المقاييس للحكم على نظافه مكان الحكم عليه من نظافة أوسخ مكان فيه
و يبقى السؤال المؤرق متى نشوف حمامات عامه نظيفه خصوصا في المحطات


ما علينا .. يوم كنت في حمامات أحد المولات
كان كل ما يطلع الواحد من حمام يدخل واحد بعده يسحب السيفون
طبعا شي حلو بس أنا اللي كان شاغلني وش الفيزا اللي جا فيها ؟
( أكيد ساحب سيفون ؟ )
يعطيه العافيه بس كان ودي اسأله ما تخاف من الصعيدي ؟ اللي ضحك على أهل مصر
( اللي قص تذكرة قطار و ما ركب القطار )


في مره دخلت حمام لقيت مكتوب عند المغاسل اغسل يدك
و يوم دخلت الحمام لقيت مكتوب اسحب السيفون
بالأول حسيته شي يضحك ع أساس انه شي بديهي
بس يوم شفت الوضع اللي حاصل
جيت عند اسحب السيفون و كتبت ( تكفى )


من المناظر اللي ما تتكرر كثير اني مره دخلت حمام الا اسمع واحد يكلم جوال
بالأول طلعت اتأكد أنا دخلت حمام و لا كابينه
بس بعدين قلت زين عساهم بس يرسلون فاكس
المهم الرجال ما طول شوي الا سمعته يقول يلا توصي شي
فـ الظاهر أن اللي يكلمه قال له لا سلامتك ( لا تنسى تسحب السيفون )


لكن ذا يهون بعضهم يا جوّه
دخلت على واحد الا اسمعه منطرب ع الآخر و يقول ( دندن دنق دندن دنق )
صراحه مدري وشهو بس الظاهر ( سامري مسرّع )
المهم أنا تنحنحت بس يوم شفت مافي فايده سحبت سيفون عساه ينتبه
بس الرجال داخل جو بقوووه دندن دنق
فـ سحبت سيفون مره ثانيه .. بس ماحولك أحد
الرجال طرباااان و صراحه أطربني معه
فـ صار هو يقول دندن دنق و أنا ( اسحب له سيفون )


عموما اذا تكلمنا عن الحمامات لازم نتكلم عن الكتابات في الحمام
شد انتباهي مره واحد كاتب تأكد من وجود الماء قبل حدوث الكارثه
فـ حلو الاحساس بالوعي و ( الحس الدرامي )
مع أن المشكله طبعا انك غالباً ما رح تنتبه للي مكتوب الا بعد ( حدوث الكارثه )


بس اللي استغربت منه مره واحد كاتب وش اسوي بـ صاحبٍ خوان ؟
أنا استغرب من سؤال مثل ذا في هالمكان
واضحه جداً ( اسحب عليه سيفون )



..




(4) قرصــة أذانيك (4)




العيون الناعسه و الحواجب اللي ( قايلةٍ كذا )
و الجبهه اللي مدري ايش و الخشم و الخدود و الفم و الشفايف .. الخ
تغزلنا بكل شي بس ماني عارف ليه مافي أحد يتغزل بـ ( الأذاني ؟ )






أغــار من شـعرك إليـّــا ضم أذانيـك
إليـّـا شـم طـيب ضـو الـخجـل فيهــا


و أغـار من أطيـاف صوتٍ تناديـك
حطّت على شواطي سمعك مراسيها


احتري طلـــة قمــر تنور مـحـاكيــك
إليـّـا بـان بيـن الـشعــر مـواريـهـــا


يـا شعـرهــا ربي ببـَكـله يـجـازيـك
نـار غـيرة في قـلـبي وش يـطفـيهــا


حـروفي أطفال تفرح في أراضيك
تلبس الهـمس لـ أجـل يـمك تدنِـيهــا


مكسبي من الزعـل قرصـة أذانيـك
تـكـفى حـبـيـبي عـني لا تـخـبـيهــا









لسى ماني مقتنع انها مسألة اسلوب : )
الرجوع الى أعلى الصفحة اذهب الى الأسفل
 
منقوووول سوالف حلوه
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
مـــنــــتــــديــات كـــويــت الـــحــب :: الاقسام العامه :: القسم العاام-
انتقل الى: